Косовскиот премиер Албин Курти вели дека Република Српска станала еден вид руски Калининград во регионот и дека тоа е закана за стабилноста на Западен Балкан.
Курти рече дека Русија е заинтересирана за продолжување на војната и ја гледа како закана не само за Молдавија и Грузија, туку и за Западен Балкан преку Србија, додавајќи дека Република Српска станала еден вид Калининград во нашиот регион, пренесува Kosovo online.
За потсетување, Калининградската Област е руска ексклава која граничи со Литванија на север, Полска на југ и со Балтичкото Море на запад. Проширувањето на ЕУ во 2004 година, кога Полска и Литванија станаа членки, значеше дека областа контролирана од Русија оттогаш има копнени граници со ЕУ.
Курти, исто така, истакна дека побарал од САД да му помогнат на Косово да се приклучи на НАТО.
„Ние сакаме да влеземе во НАТО и ЕУ, но многу е можно поради многу фактори да влеземе во НАТО пред ЕУ. Побаравме од САД да ни помогнат за членството во НАТО. Добивме одговори, тесно соработуваме и правиме еден вид транзиција на нашата армија“, откри тој.
Додаде дека Косово го зголемило буџетот за одбрана за 52% и ги гледа Соединетите Држави како незаменлив сојузник во зајакнувањето и заштитата на безбедноста на Косово и во чекорите кон членството во НАТО.
„Верувам дека руската инвазија на Украина ќе ги зголеми изгледите и брзината на членството на Косово во НАТО“, рече Курти.
Тој неодамна за CNN изјави дека Косово мора да биде многу внимателно бидејќи Србија „може да игра улога на застапник на Руската Федерација на Западен Балкан“.
„Руското Министерство за одбрана има посебна канцеларија во српското Министерство за одбрана. Сега кога рускиот 'блицкриг' во Украина пропаѓа, ние сме загрижени дека тие може да се обидат да го прошират конфликтот и дека Западен Балкан може да биде ново руско бојно поле преку нивните прокси (посредници) - Србија или Република Српска“, рече Курти.
