Во моментов режисерот Квентин Тарантино е во фокусот на вниманието поради неговиот најнов филм, „Once Upon A Time in Hollywood“, но нема намера да паузира, туку веќе работи на нов проект кој е продолжение на еден од неговите најпопуларни филмови.
„Once Upon A Time in Hollywood“ ќе се појави во киносалите во август оваа година, а критичарите кои добија шанса да го гледаат филмот на фестивалот во Кан беа восхитени од него и го нарекоа „едно од најдобрите дела“ на Тарантино.
Тарантино го напиша сценариото за стрип кој ги обработува случувањата на Џанго по филмот „Django Unchained“ од 2012 година, а сега работи на филмска адаптација на истиот тој стрип. Овојпат наместо во режисерска, тој ќе ја преземе само продуцентската улога, а сценариото за филмот ќе го пишува стенд-ап комичарот Џерод Кармајкл.
Филмот ќе продолжи да ги следи случувањата на ликот кој во оригиналниот филм го толкуваше Џејми Фокс, а во него тој ќе го сретне Зоро (да, ОНОЈ Зоро кој го глумеше Антонио Бандерас) и двајцата се договараат дека Џанго ќе му стане личен телохранител на Зоро. Името на филмот, колку и да звучи смешно, ќе биде „Django/Zorro“.
Плановите за овој проект започнаа уште во 2014 година, но студиото Sony не можеше да најде заеднички јазик со Тарантино бидејќи тие сакаа тој да го режира филмот, а тој инсистира дека сака да биде само продуцент. Доколку Квентин реши да го режира „Django/Zorro“, тоа ќе биде неговиот последен филм, поради тоа што тој одамна најавува дека ќе се пензионира по десеттиот филм.