Шпанската фудбалска лига Ла Лига денеска соопшти дека одбила да ја прифати отштетата од 222 милиони евра, колку што како клаузула стои во договорот на Нејмар, а кои ПСЖ треба да ѝ ги плати на Барселона.
„Адвокатите на фудбалерот дојдоа во Ла Лига да ја платат клаузулата за откуп, меѓутоа тоа е одбиено“, рекол портпаролот на Примера.
Одбивањето на Ла Лига да ги прифати парите, веројатно, ќе го забави трансферот, но тешко е да се верува дека ќе може да го блокира.
Претседателот на Ла Лига, Хавиер Тебас, пред неколку дена, во едно интервју истакна дека Ла Лига нема да ја прифати исплатата од страна на ПСЖ бидејќи со тоа потенцијално се кршат правилата на УЕФА и нејзиниот финансиски фер-плеј.
Нејмар вчера им соопшти на соиграчите од Барселона дека сака да го напушти клубот и дека добил дозвола од челниците да го направи тоа.
Доколку трансферот биде реализиран, тој ќе биде најголем во историјата на фудбалот, односно двојно поголем од минатогодишниот на Пол Погба, кога тој од Јувентус се пресели во Манчестер Јунајтед.
