Феноменот Ла Ниња најверојатно во наредните месеци ќе ја зафати западна и северна Европа и ќе донесе постудено време, се согласуваат метеоролозите.
Тие тврдат и дека веројатноста за оваа појава постепено се зголемува.
Шансата климатскиот феномен Ла Ниња да се случи помеѓу ноември и јануари е 83 проценти. Пред еден месец таа веројатност беше само 74 отсто, објави Американскиот центар за климатски прогнози.
Овој феномен може да предизвика суша во Калифорнија, Бразил и Аргентина, да донесе обилни дождови во Индонезија и Австралија - и што е најважно од наша перспектива ќе донесе постудено време во Европа.
„За зимата се предвидува блага форма на феноменот Ла Ниња, што генерално значи температури пониски од нормалните во Западна Европа, така што очекуваме посвеж период во ноември и декември“, вели Ендрју Педрини, метеоролог во Atmospheric G2.
Станува збор за океански и атмосферски феномен, што е постудена спротивност на феноменот Ел Нињо.
Овој феномен се карактеризира со пад на температурата на површинските води во источниот екваторијален Тихи Океан за 3 до 5°C и обично трае најмалку пет месеци.
