Деновиве сѐ погласни се шпекулациите за враќање на Роналдо во Серија А, а сега излезе информација дека португалскиот ас се понудил да му се приклучи на Интер.
Италијанскиот дневен весник La Repubblica, кој не е спортски туку општ и со седиште во Рим, објави вест дека агентот на Роналдо, Жорже Мендеш, го понудил својот клиент на Интер, но оттаму стигнал негативен одговор.
Кристијано Роналдо сака да игра во клуб кој настапува во Лигата на шампионите откако изминатава сезона неговиот Манчестер Јунајтед не успеа да се избори за место во ова натпреварување.
Интер има место директно во фазата по групи, но „Нераѕурите“ финансиски не можат да ги задоволат барањата на Роналдо, а згора на тоа веќе имаат доволно напаѓачи, плус Ромелу Лукаку кој е на чекор од камбек. Оттаму и причината поради која наводно го одбиле Роналдо.
Роналдо се поврзува и со преселба во Рома поради Жозе Мурињо, но тоа е помалку веројатно со оглед на тоа што овој клуб исто така нема да игра во Лигата на шампионите.
Засега нема најави за можно враќање во Јувентус, каде настапуваше од 2018 до 2021 година.
