Лансирана сонда како дел од мисијата за одбрана на Земјата од астероиди

Европската вселенска агенција (ЕСА) лансираше сонда во вселенското пристаниште Кејп Канаверал во Флорида како дел од тестот што има за цел да помогне да се спаси Земјата од можни удари на астероиди.

Именувана по грчката божица на бракот, сондата Hera на ЕСА треба да го истражи намерниот удар на вселенското летало на НАСА DART пред две години врз астероидот Диморфос. Истражувачите се надеваат дека мисијата ќе обезбеди вредни сознанија кои би можеле да помогнат во заштитата на Земјата од удари на астероиди во иднина.

Генералниот директор на ЕСА Јозеф Ашбахер ја нарече мисијата „чекор кон планетарна одбрана“. Научниците во моментов не гледаат астероиди кои би можеле да ја погодат Земјата со фатални последици во следните три генерации, но Ашбахер вели дека Hera е на важна мисија.

„За прв пат во историјата на човештвото, имаме способност да ја одбраниме планетата“, рече Ролф Денсинг, директор на контролниот центар на ЕСА во Дармштад, Германија.

Поминувајќи покрај Марс на својот пат, Hera треба да стигне до Диморфос, помал бинарен астероиден систем, во декември 2026 година.

Управувана од контролниот центар во Дармштад, сондата е опремена со неколку камери, како и системи за мерење базирани на ласер и радар за да се добие увид во изгледот на астероидот долг 150 метри по ударот на НАСА.

Hera, исто така, треба да го одреди степенот до кој Диморфос бил исфрлен од патеката од ударот, со надеж дека таквите удари би можеле да се користат во иднина за да се оттргнат астероидите кои се упатуваат кон Земјата.