Лажни ковид-пасоши се продаваат преку интернет по поволни цени во голема измама што ги вознемири властите на многу земји кои сакаат да ги оживеат патувањата и економијата, велат експертите за сајбер-безбедност.
Од Исланд до Израел, голем број земји почнаа да ги укинуваат ограничувачките мерки при преминување на границите за луѓето кои можат да докажат дека биле вакцинирани.
„Луѓето се обидуваат да ги заобиколат правилата правејќи лажни документи, ставајќи ги во опасност животите на другите“, изјави за Reuters Бену Арора, основач на компанијата за сајбер-разузнавање Cyble.
Тој додава дека има многу страници на dark web каде се продаваат лажни документи по поволни цени.
– Лажни документи за вакцинација може да се купат за 12 долари, додаде Арора, велејќи дека бројот на продавачи е зголемен од крајот на февруари.
Одед Вануну од компанијата за сајбер-безбедност Check Point изјави дека истражувачите во компанијата утврдиле бројни реклами на dark web што нудат документи кои наводно биле издадени во САД, Русија и други земји.
„Постои голема побарувачка за овие лажни документи“, нагласи Вануну.
– Измамници се појавија и на регуларни веб-страници и на различни платформи, вели Чад Андерсон, безбедносен истражувач во DomaineTools.
Минатата недела 45 државни обвинители на САД потпишаа писмо со кое ги повикуваат раководствата на Twitter, eBay и Shopify да преземат итни мерки и да спречат продажба на лажни податоци на нивните платформи.