Најголемата кошаркарска ѕвезда секое лето е на сите насловни страници, а шпекулациите за ова следното лето се дека тој нема да остане со тимот на Кавалирс. Тој, како и сите фанови на НБА лигата не ги крие симпатиите за новата сила на Истокот – Филаделфија Сиксерс.
Леброн Џејмс наредното лето треба да одлучи дали кариерата ќе ја продолжи во родниот град или ќе замине во друг тим.
Досега како најсериозна дестинација се споменуваше тимот на Лос Анџелес Лејкерс, кој ослободи и место во селари кеп за да го намами Леброн да се придружи на младата дружина во „Градот на ангелите“. Но, нивните игри оваа сезона не импресионираа и тешко е да се замисли дека играч како Џејмс, кој веќе има 32 години, би заминал да игра во екипа која не би му дозволила да се бори за шампионска титула.
Оваа сезона играчите на Филаделфија привлекоа многу погледи со одличните игри, а фановите и експертите се „заљубија“ во нивното дуо составено од Џоел Ембиид и Бен Симонс. За Австралиецот Симонс стигнуваа пофалби од Леброн Џејмс уште пред тој да биде драфтуван во лигата, а сега, Симонс ги возврати пофалбите и на неколкупати рече дека многу се угледува на Џејмс, не само на теренот туку и надвор од него.
„Сметам дека ако нападот ви е составен од Џејмс, Ембиид и Симонс, тоа ќе биде повеќе од сериозен тест за Голден Стејт Вориорс. Ако се работи за наредната сезона – да, можете да ја освоите титулата со таков тим“, изјави аналитичарот на Sports Illustrated, Бен Голивер.
Освен наклонетоста на играчите еден према друг, уште една работа која им оди во прилог на Сиксерси е тоа што благодарение на добрата работа со селари кепот во последните години, тие можат да си ја дозволат платата на Леброн Џејмс, кој сигурно ќе бара максимален договор.
Сепак, останува да видиме што ќе одлучи Кралот Џејмс, бидејќи пред него е цела сезона во која треба да наоѓа начин да се справи со чудовиштето наречено Голден Стејт Вориорс.