Откако минатата недела славеше во супервелеслалом, Чехинката Естер Ледецка во Пјонгчанг освои златен медал и во сноуборд и така стана првата жена која освоила златни медали во два различни спортови на Олимписките игри.
Победата на 22-годишната Ледецка во супервелеслалом дојде како големо изненадување, додека нејзината победа во сноуборд натпреварувањето беше сосем очекувана.
На второто место, позади Чехинката, се пласираше Селина Жорг од Германија, која во финалето беше побавна за само 0,46 секунди. Бронзена во сноуборд натпреварувањето во женска конкуренција беше Тересија Хофмајстер која исто така ја претставува Германија.
Естер Ледецка е само петтиот спортист кој освоил златни медали во два различни спортови на Олимписките игри, а сите 4 претходни случаи се мажи.
Нејзиниот успех и приказна ќе бидат една од најзборуваните теми по крајот на ЗОИ во Пјонгчанг, бидејќи за да се натпреварува во супервелеслалом таа мораше да позајми скии, кои потоа се покажаа како победнички.