Славниот бразилски фудбалер Пеле заврши во болница откако му се слошило поради исцрпеност во четвртокот наутро во Лондон, пренесуваат британските медиуми.
Пеле кон крајот на минатата година имаше проблеми со простата и бубрезите, но после направени тестирања било утврдено дека преголемиот замор е единствена причина поради која му се слошило.
Бразилецот, кој според мислењето на многумина е најдобриот фудбалер на сите времиња, морал да ја откаже вечерата која била планирана во негова чест во хотел во Лондон.
„Во раните утрински часови во четвртокот, на Пеле не му беше добро и беше однесен во болница, каде му беа направени дополнителни тестирања. Тие покажаа дека станува збор само за исцрпеност. Недостатокот на течности е исто така една од причините и докторите ја следат неговата здравствена состојба, која не е загрозена“, изјавија организаторите на вечерата во хотелот.
За потсетување, Пеле со репрезентацијата на Бразил освои три Мундијали, а вкупно забележа 93 настапи и постигна 77 погодоци за Бразил.