Легендарниот музичар Пол Сајмон најави дека ќе се повлече оваа година и дека поради тоа ќе направи последна турнеја со која ќе се збогува од своите обожаватели.
Турнејата „The Homeward Bound“ ќе опфати концерти во Велика Британија и САД.
Во соопштението објавено на социјалните мрежи, Сајмон го опишува своето пензионирање како природен крај на кариерата.
Истакна дека тоа му претставува некој вид на олеснување, бидејќи моментално не може да посвети доволно време на сопругата и семејството.
Покрај тоа истакна и дека смртта на гитаристот во неговиот бенд имала влијание во донесувањето на неговата одлука. Сајмон, сепак, остави простор за повремено враќање на сцената, во вид на некои хуманитарни концерти.
Сајмон музичката кариера ја започна пред повеќе од 60 години, каде со својот школски пријател Арт Гарфанкел настапувал под име „Том и Џери“.
После краткото растурање на бендот, повторно ги здружиле силите во 1963 година, а набргу стекнале светска слава со безвременскиот хит „The Sound of Silence“.
Тие станале едни од најпопуларните музичари во светот во тоа време, посебно после објавувањето на хитовите „Bridge Over Troubled Water“ и „Mrs Robinson“.
Сајмон и Гарфанкел конечно ја прекинале соработката во 1970 година, а Сајмон започнал соло кариера.
Издал неколку исклучително успешни албуми, како „Still Crazy After All The Years“ од 1975 година, а деценија подоцна и „Graceland“.
Во текот на својата кариера, Сајмон издал 13 соло албуми и освоил 16 Греми награди.
