Легендарниот ММА борач и поранешен УФЦ шампион Квинтон Џексон изјави дека не сака да влезе во Куќата на славните, иако без сомнежи таму му е местото.
Џексон има 43 години и во тој спорт е од 1999 година, ги мина сите најсилни организации. Во кариерата има 52 борби од кои 38 победи (20 со нокаут), а врвот на кариерата му беше во 2007 година кога го освои УФЦ појасот во полутешка категорија, со нокаут над Чак Лидел.
Иако официјално кариерата уште не му е завршена и покрај тоа што последната борба му беше пред две години, тој моментално нема договор со ниту една организација. Сепак, УФЦ има намера да го инаугурира во Куќата на славните.
Тој ја одбива таа идеја и вели дека тоа воопшто не му е важно.
„Воопшто не сакам да влезам во Куќата на славните на УФЦ, не ми е ни важно. Не се борам за да бидам член во Куќата на славните, ниту за да бидам славен. Почнав да се борам за да можам да си ги плаќам сметките. Дајте ми пари. Наградете ме на тој начин“, порача директно тој.
Притоа објасни дека ММА борачите не се како бејзбол играчите или рагбистите бидејќи не добиваат пензија и слични работи.
„Тие влегуваат во Куќата на славните и им се исплаќаат пензии и слични работи. Имам многу повреди здобиени заработувајќи пари за УФЦ и продавајќи им влезници. Зошто би ме интересирало влегувањето во Куќата на славните?“, порача Џексон.
И ја кажува вистината, има донесе многу пари во УФЦ, станува збор за над 4 милијарди долари. Само од борбата во 2010 година против Рашад Еванс инкасира повеќе од милион долари.
