F40 беше и остана икона помеѓу суперспортските автомобили од 80-тите и раните 90-ти.
Деновиве се одбележаа точно 30 години откако во Маранело официјално беше претставен F40. Легендарниот модел бил развиван во тајност, а самиот процес се одвивал многу брзо - автомобилот се појавил на патиштата само 13 месеци откако во јуни 1986 била започната работата на моторот.
Моторот е развиен од единица која го движела Ferrari 288 GTO, а во F40 овој 2.9 литарски V8 би-турбо развивал 478 КС.
За максимално да го олеснат автомобилот, инженерите користеле лесни материјали секаде каде било возможно - обилно е употребуван магнезиум, а конструкцијата од челичните цевки е зајакната со панели од кевлар.
Во изработката на каросеријата користени се јаглеродни влакна, а за прозорите пластични материјали.
Целта на Ferrari била да направи вистински возачки, бескомпромисен автомобил без електроника, со минимален комфор за возачот.
Во периодот од 1987 до 1992, од фабриката излегле нешто повеќе од 1.300 примероци од моделот F40. Денес, добро сочуван примерок на аукциите достигнува цена од преку милион долари.
