Лос Анџелес Лејкерс изгледаат како најголемиот победник од летото бидејќи успеаја да го потпишат најдобриот кошаркар во светот, Леброн Џејмс. Сепак, амбицијата на Лејкерс не застанува тука, затоа што тие имаат во план да потпишат уште неколку суперѕвезди.
Последните неколку години од кариерата на Коби Брајант и сезоните откако тој се пензинираше, Лејкерси имаа само епизодна улога во НБА лигата. Но, се чини дека од оваа сезона се става крај на темната ера на Лос Анџелес и почнува една нова ера – ера на победи.
На почетокот на летото се случи она што целата кошаркарска јавност го очекуваше последната деценија – Леброн Џејмс потпиша за Лос Анџелес Лејкерс. Новото раководство на кошаркарскиот гигант има амбициозен проект во кој Џејмс, Лонзо Бол и Брендон Инграм ќе бидат споени со уште неколку врвни имиња од НБА лигата. Следна цел е Клеј Томпсон, еден од најдобрите шутери во историјата и актуелен НБА шампион.
Наредната сезона Клеј Томпсон ќе биде слободен агент, што значи дека ќе добие шанса да преговара со тимовите од лигата за тоа каде сака да потпише. А кога се случува тоа, Лејкерс секогаш имаат предност пред другите тимови поради богатата историја, одличната географска положба и отворениот маркет кој може да биде искористен во комерцијални цели.
Во текот на кариерата, Клеј Томпсон ниту еднаш не падна под 40% со шутот од линијата за три поени, а во последните три сезони тој постигнува по 20 поени по натпревар. Освен тоа, неговата игра во одбраната е крајно потценета, бидејќи тој е еден од најдобрите еден-на-еден дефанзивци во лигата.
