Ѕвездата на Њу Орлеанс Пеликанс, крилниот центар Ентони Дејвис, има само една година останато од договорот со клубот, по што ќе стане слободен агент и ќе има шанса да потпише со клуб по негов избор. Од таа причина, раководството на Пеликанс реши да го трејдува за да добие нешто за возврат, а два тима веќе се појавија како потенцијални дестинации за шесткратниот Ол Стар кошаркар.
Трејдот што не им успеа на почетокот на оваа година, Лејкерс ќе се обидат да го направат во текот на наредните неколку недели, но овојпат како конкурент го имаат Бостон Селтикс, кој најчесто излегува како победник од трејдовите со другите екипи од лигата.
Според еминентниот НБА инсајдер Ејдриан Војнаровски, Лејкерс ги понудиле Брендон Инграм, Лонзо Бол и четвртиот пик од овогодинешниот драфт во трејдот за Ентони Дејвис. Но, Њу Орлеанс Пеликанс не сакаат да прифатат ваква понуда бидејќи сакаат да вметнат и трет тим во дискусиите за трејд на нивната најголема ѕвезда.
Од друга страна, Бостон Селтикс и нивниот генерален менаџер Дени Ејнџ се подготвени да се откажат од дел од нивните млади играчи, во комбинација со еден или повеќе пикови на драфтот, за да го добијат Ентони Дејвис. Во овој тим се отвори место во селари кепот откако Кајри Ирвинг најави дека летово ќе стане слободен агент, па раководството ќе се обиде да го пополни тоа место со Дејвис, кој подолго време е на мета на Селтикс.
Раководството на Њу Орлеанс Пеликанс, предводено од новиот генерален менаџер Дејвид Грифин, инсистира на спроведување на трејд за Ентони Дејвис кој вклучува три тима со цел да добијат повеќе за возврат во размената за нивниот најдобар играч.