Како и секој друг лек, ибупрофенот има несакани ефекти.
Ибупрофенот првпат стана достапен во 1984 година како понежен и побезбеден лек од аспиринот. Тоа е нестероиден анти-инфламаторен лек кој се користи за ублажување на болката и намалување на температурата. „Ибупрофен е безбеден ако се користи правилно, но долгорочната континуирана употреба може да предизвика некои здравствени проблеми“, вели д-р Кенет Пери.
Подолу прочитајте што лекарите нагласуваат дека треба да знаете пред да земете ибупрофен.
Може да ја намали болката и воспалението
Ибупрофен работи со инхибиција на простагландин, хемикалија што се наоѓа природно во телото и е одговорна за појавата на воспаленија. Ибупрофен е прогласен за најбезбеден нестероиден антиинфламаторен лек на пазарот, а на некои им е полесно да го земаат од аспирин, затоа што е потребна помала доза за да почне да делува. Исто така, има помал ризик од иритација на стомакот.
Може да го зголеми ризикот од срцев и мозочен удар
„Лекови како ибупрофен доаѓаат со предупредување дека можат да предизвикаат поголем ризик од сериозни кардиоваскуларни состојби предизвикани од згрутчување, како срцев или мозочен удар. Оние кои ги земаат овие лекови треба да земат најниска можна доза доволна за да ја ублажат болката. Исто така, ако треба да ги земате овие лекови повеќе од една недела, задолжително консултирајте се со вашиот лекар“, вели д-р Лин Постон.
Може да предизвика главоболки
Иронично, првиот лек кон кој многумина од нас се свртуваат токму поради главоболки, може да предизвика главоболка ако се зема премногу често. „Рутинската употреба на лекови како ибупрофен за главоболки може да предизвика главоболки откако ќе престанеме да ги земаме“, вели д-р Постон.
Може да го зголеми притисокот
„Редовното земање ибупрофен може да го зголеми крвниот притисок“, вели Постон. Самиот висок крвен притисок често нема симптоми, но ако не се лекува, состојбата може да предизвика долгорочни последици во форма на кардиоваскуларни заболувања.
Може да го попречи делувањето на другите лекови што ги земате
Ако земате други лекови или додатоци со ибупрофен, разговарајте со вашиот лекар.
„Ибупрофен реагира со многу други лекови и додатоци без рецепт. Кога тоа ќе се случи, секое дејство на некоја активна супстанција во лекот може да се зголеми, што резултира со несакани ефекти. Може да се намали и дејството на активната супстанција, во тој случај не го добивате она што треба од лекот“, вели д-р Даниел Пламер.
Може да предизвика отоци
„Важен несакан ефект при земање ибупрофен може да биде и отекување на нозете или на целото тело“, вели д -р Магдалена Кадет. Отекувањето е предизвикано од вишок течност што се задржува во ткивото и е чест несакан ефект на нестероидни антиинфламаторни лекови. Обично поминува штом престанете да ги земате таквите лекови.
Може да предизвика гастроинтестинални проблеми
„Ако некој редовно зема ибупрофен, стомакот ја губи заштитната мембрана и постои поголем ризик од повреда. Со текот на времето, ова може да резултира со гастритис, чир или перфорација, што е крајно болно и може да доведе до крварење што може да биде опасно по живот“, вели д-р Бери Горлицки.
Може да предизвика оштетување на бубрезите
Никогаш не ја надминувајте препорачаната доза на ибупреофен, може да биде опасно.
„Ако не се земе правилно, ибупрофенот може да предизвика оштетување на бубрезите“, вели д-р Пери. Оваа штета во некои случаи може да биде неповратна и некои луѓе би можеле да завршат доживотно на дијализа.
Може да предизвика оштетување на црниот дроб
„Вашиот црн дроб метаболизира сѐ што консумирате. Хроничната употреба на ибупрофен може да ги оштети клетките на црниот дроб. За среќа, црниот дроб се обновува, но ако штетата постојано се повторува, може да доведе до цироза“, вели д-р Сидарт Тамбар.
Може да го зголеми ризикот од крварење
„Ибупрофен ја инхибира циклооксигеназата, ензим вклучен во процесите што го контролираат крварењето и хемостазата, процес кој го штити телото од прекумерна загуба на крв. Дневната долгорочна употреба на ибупрофен може да го зголеми ризикот од неконтролирано крварење“, вели д-р Мониша Баноте.