Рамазан, периодот во кој муслиманските верници постат од изгрејсонце до зајдисонце, започна на 2 април. Што значи ова за дијабетичарите кои треба да го држат шеќерот во крвта под контрола?
Дали лекарите мислат дека дијабетичарите смеат да постат? Одговорот зависи од тоа за каков тип на дијабетес се работи.
Дијабетесот е доживотна здравствена состојба која предизвикува високи нивоа на шеќер во крвта. Постојат два главни типа на дијабетес - дијабетес тип 1 и дијабетес тип 2.
Кај дијабетес тип 1, имунолошкиот систем на телото ги напаѓа клетките што произведуваат инсулин, а дијабетес тип 2 е состојба во која телото самостојно не произведува доволно инсулин, што предизвикува клетките да не реагираат правилно на инсулинот.
Постот за време на Рамазан не се препорачува за луѓе со дијабетес тип 1, вели диететичарката Несрин Јавуз во текст за германски весник на фармацевти.
Ова важи и за оние со оштетување на бубрезите и за луѓето кои земаат апчиња поради болеста, вели Јавуз, член на работната група за дијабетес и мигранти, која е дел од Германското здружение за дијабетес.
Муслиманите со хронични болести како што е дијабетесот се ослободени од обврската за пост, иако многумина, сепак, сакаат да учествуваат во рамазанскиот пост.
Оние со дијабетес тип 2 може да размислат за постење, но треба да бидат особено внимателни во конкретни случаи.
„Дури и за луѓето кои не си инјектираат инсулин, важно е да имаат добри долгорочни нивоа на гликоза во крвта“, вели Јавуз. Оние кои инјектираат инсулин мора да бидат особено внимателни, бидејќи во спротивно може да западнат во тешка хипогликемија.
На сите дијабетичари им се советува да разговараат со својот лекар пред да почнат да постат за да ја проценат општата здравствена состојба на пациентот, постоечката терапија, ризиците од постот и да помогнат во креирањето на план за исхрана. Задолжително е и редовно мерење на нивото на шеќер во крвта.
Се препорачува овој преглед да се направи еден до два месеци пред Рамазан. Не треба да се заборави дека постарите и трудниците со дијабетес се изложени на ризик.
Ако пациентот со дијабетес е изложен на ризик од хипогликемија за време на целодневен пост, му се советува веднаш да престане да постира и да го врати шеќерот во крвта под контрола со земање, на пример, малку гликоза, вели Јавуз.
