Шпилберг, 29 јуни 2019 (МИА) – Шарл Леклер и Ferrari ги освоија квалификациите за пол-позиција пред Големата награда на Австрија со феноменално темпо и нов рекорд на патеката „Ред бул ринг“.
Луис Хамилтон и Mercedes останаа втори со скоро три десетини зад себе, додека трет остана Макс Верстапен во домашната трка на „биковите“.
За Ferrari, сепак, чувствата повторно се измешани, бидејќи Себастијан Фетел имаше проблеми со болидот и не успеа да излезе на патеката во завршната фаза од квалификациите.
Четврто место освои Валтери Ботас со Mercedes, следен од Кевин Магнусен и Хас, што е исклучително постигнување за тимот од САД.
Аплаузи си освои и Ландо Норис со Мекларен, кој заврши шести, по што следеа двата автомобила на Alfa Romeo.
Пјер Гасли со Red Bull се жалеше на проблеми со моќноста на болидот и остана само деветти. Десетти утре ќе тргне Себастијан Фетел.
