Ниеден медиум не е под истрага на Специјалното јавно обвинителство, појасни обвинителката Ленче Ристовска пред да почне да одговара на новинарски прашања, по денешната прес-конференција на која објавија четири нови истраги.
Таа најостро ги демантираше тврдењата дека СЈО врши притисок врз медиумите.
„Ниеден медиум не е под истрага и не е отворена истрага за да се зборува дека ние правиме притисок. За правилно и објективно информирање сите медиуми треба да бидат информирани за работата на СЈО“, изјави Ристовска.
Таа објасни дека кривичните дела на поединци не се кривични дела на медиумот и замоли некои медиуми да не шпекулираат затоа што СЈО е професионална институција и не врши притисок на медиуми.
СЈО денеска соопшти дека отвори четири нови истраги за финансиски криминал, против четири лица, наречени „Табла“, „Триста“, „Тотал“ и „Тифани“.