Меѓународната фудбалска федерација (ФИФА) за најдобар играч во светот во сезоната 2021/2022 го избра аргентинскиот фудбалер Лионел Меси.
Во Париз се одржа церемонијата на доделување на наградите The Best, а во изборот учествуваа капитените и селекторите на сите светски селекции, како и новинари.
ФИФА ја доделува оваа награда врз основа на учинокот на играчите за периодот од август 2021 до 18 декември минатата година, а според мислењето на селекторите, капитените, новинарите и навивачите од сите земји во светот, најдобар играч во сезоната зад нас беше напаѓачот на ПСЖ.
Иако имаше скромна клупска сезона во парискиот клуб, пресуден беше маестралниот настап на Светското првенство каде што ја предводеше Аргентина до светската титула, па Меси по седми пат го понесе епитетот најдобар играч во светот во изборот на ФИФА, меѓу кои и наградите што ФИФА ги доделуваше заедно со France Football пред да стане независна во 2016 година.
Зад Меси беа Килјан Мбапе и Карим Бензема.
Потсетуваме, претходните добитници на наградите на ФИФА за најдобар играч во светот беа: Лотар Матеус (1991), Марко ван Бастен (1992), Роберто Баџо (1993), Ромарио (1994), Жожџ Веа (1995), Роналдо (1996, 1997 и 2002), Зинедин Зидан (1998, 2000 и 2003), Ривалдо (1999), Луиш Фигу (2001), Роналдињо (2004 и 2005), Фабио Канаваро (2006), Кака (2006) Кристијано Роналдо (2008, 2013, 2014, 2016 и 2017), Лионел Меси (2009, 2010, 2011, 2012, 2015, 2019, 2022), Лука Модриќ (2018) и Роберт Левандовски (2020 и 2021).
Останати награди:
Најдобар тренер - Лионел Скалони (Аргентина)
Најдобар голман - Емилиано Мартинес (Астон Вила/Аргентина)
Пушкаш награда за најдобар гол - полскиот парафудбалист Марчин Олексиј, човек кој нема една нога и игра со патерици, постигна гол со ножички.
Во идеалниот тим се најдоа: Тибо Куртоа; Ашраф Хакими, Жуау Канселу, Вирхил ван Дијк; Кевин Де Брујне, Лука Модриќ, Каземиро; Лионел Меси, Килјан Мбапе, Карим Бензема и Ерлинг Холанд.
Најдобра фудбалерка во светот е Алексиа Путељас (Барселона/Шпанија).
Фер плеј награда - Лука Лочошвили, кој додека играше за австриски Волфсбергер на натпревар против виенска Аустриа во февруари 2022 му го изваде јазикот на онесвестениот Георг Тајгл, со што му го спаси животот. Лочошвили сега ги брани боите на калчолигашот Кремонезе, а е репрезентативец на Грузија.
Награда за најдобри навивачи - Аргентина, поради одличното навивање на Мундијалот во Катар.