Грдо ќе завршат феноменалните осум години на Роберт Левандовски во Баерн.
По 375 натпревари, 344 гола, 72 асистенции и освојување на сите трофеи, тој јавно се кара со клубот затоа што сака да оди во Барселона, а Баерн не му дозволува. Поточно, клубот не сака да го спушти обештетувањето под 50 милиони евра фиксно, а Левандовски и Барселона сметаат дека со оглед на неговата возраст (наскоро ќе има 34 години), заслугите во Баерн и фактот што договорот му завршува следното лето, тој заслужил да си замине со помал надомест.
Пред една недела Баерн ја одби третата официјална понуда на Барселона, иако таа беше повисока од претходните две. Сепак, 40 милиони евра фиксно, но на рати, и 5 милиони евра евентуално, доколку се исполнат условите поврзани со бонусите, во Баерн се сметаат за недоволни. Bild и Фабрицио Романо пишуваат дека Баерн би прифатил најмалку 50 милиони евра, но фиксно.
Левандовски е револтиран од односот на Баерн:
„Откако поминав толку многу години во клубот и секогаш бев подготвен и достапен, и покрај повредите и болките, и секогаш давав максимум, единствената вистинска работа би било да се најде решение за двете страни, а не да се инсистира на еднострано. Едноставно нема смисла, не после сите овие години.
Би разбрал ако бев во Баерн две или четири години, но по толку трофејни години во кои помогнав да се победи, секогаш подготвен и со волја, почитта и лојалноста мора да бидат поважни од бизнисот.“