Најдобриот играч за изминатава година открива дека пред осум години за малку ќе бил ангажиран од Алекс Фергусон.
Малку недостасувало полскиот голгетер летото 2012 година да потпише за Манчестер Јунајтед откако сер Алекс Фергусон лично го побарал.
„По мојата втора година во Дортмунд, имав разговор со сер Алекс Фергусон. Тој сакаше да дојдам во Манчестер“, открива Левандовски во интервју за France Football.
„Бев навистина заинтересиран. Дури можам да кажам и дека бев спремен да одам. Но, Дортмунд не сакаше да ме пушти. Тоа не ме разочара бидејќи тогаш работите се одвиваа одлично во Борусија“.
Тој период Фергусон потоа го донесе Робин ван Перси од Арсенал кој му помогна на Манчестер Јунајтед да ја освои тутулата во својата прва сезона во клубот (2012/13).
Гледајќи од денешна гледна точка, Лева нема што да жали што не се префрлил на „Олд Трафорд“ бидејќи падот на Јунајтед почна по таа победничка сезона која беше и последна за Ферги.
Левандовски во 2014 како слободен играч замина во Баерн каде што со успех настапува ден денес.
