Полјакот сега е трет најдобар стрелец во историјата на Лигата на шампиони откако со вчерашниот гол го надмина легендарниот напаѓач на Реал Мадрид.
Само 9 минути му беа потребни на Роберт Левандовски за да постигне гол против Лацио синоќа во Рим. По едно лошо додавање кон голманот Пепе Реина, Левандовски ја украде топката, го заобиколи шпанскиот голман и ја затресе мрежата.
Тоа беше гол број 72 за Полјакот во Лигата на шампионите со што се проби на третото место на вечната листа оставајќи го зад себе Раул Гонсалес со 71 гол.
Левандовски тие 72 гола ги има постигнато на 95 натпревари со што има високот просек од 0,76 голови по натпревар. Од тие, 17 ги постигнал во дресот на Борусија од Дортмунд, додека 55 за Баерн.
Според просекот, ненадминлив е Алфредо Ди Стефано кој на 58 натпревари има 49 голови и просек од 0,84. Тој до ваков рекорд стигна играјќи за Реал Мадрид во периодот 1955-1964.
На вечната листа убедливо прв е Кристијано Роналдо со 134 голови, а втор е Лео Меси со 119.
Топ 10 надобри стрелци во ЛШ (голови/натпревари/просек):
- Кристијано Роналдо 134 / 175 / 0,77
- Лионел Меси 119 / 148 / 0,80
- Роберт Левандовски 72 / 95 / 0,76
- Раул Гонсалес 71 / 142 / 0,50
- Карим Бензема 69 / 125 / 0,55
- Руд ван Нистелрој 56 / 73 / 0,77
- Тјери Анри 50 / 112 / 0,45
- Алфредо Ди Стефано 49 / 58 / 0,84
- Андриј Шевченко 48 / 100 / 0,48
- Златан Ибрахимовиќ 48 / 120 / 0,40