Златната копачка на Европа упати пофални зборови до неговиот поранешен тренер, каталонскиот стратег Пеп Гуардиола.
Роберт Левандовски и натаму прави дар-мар во минхенски Баерн. Со постигнати 284 голови во Бундеслигата, или вкупно 499 во својата клупска кариера збогатени со 72 за репрезентацијата на Полска, популарниот Лева е веќе еден од најдобрите напаѓачи во историјата на фудбалот.
И кога еден таков играч ќе упати пофални зборови за еден тренер, па макар тоа бил славниот Пеп Гуардиола, тие зборови имаат тежина.
„Гуардиола ме научи поинаку да го гледам фудбалот. Да ги разберам движењата, тактиките, како да ги користам во игра. По соработката со него, поинаку размислувам во играњето, бидејќи фудбалот го гледам и од страна, од поинаков агол“, вели Левандовски говорејќи за Marca.
Левандовски во Баерн дојде во јули 2014 година кога Пеп веќе беше таму. Двајцата соработуваа во наредните две сезони, сѐ додека Пеп не замина во Мначестер Сити летото 2016 година.
„Почнав да разбирам кој погрешил, кој одиграл подобро, како да се биде еден чекор пред противникот. Зборувавме за тие работи, Пеп често му ги објаснуваше тактиките. Еднаш ми рече: 'Не можам да ти помогнам да станеш подобар напаѓач, бидејќи ти веќе си одличен, но можам да им помогнам на твоите соиграчи да ја носат топката во шестнаесетникот, а потоа ти знаеш што да правиш'“, додава тој.
