Тимот на Баер немаше проблеми на гостувањето кај четвртолигашот Сарбрикен и со убедливи 3:0 се избори за финале.
Првиот финалист во Купот на Германија е веќе познат откако синоќа „Фармацевтите“ го декласираа четвртолигашот, уништувајќи му ги сништата за прво историско финале.
Во 11. минута Муса Дјаби го отвори резултатот, а осум минути подоцна Лукас Аларио зголеми на 0:2. Во вториот дел Карим Белараби го постави конечниот резултат. Интересно, при сите три гола асистираше Керем Демирбај.
Сарбрикен по четврти пат е елиминиран во полуфиналето, што е и најголем успех на клубот во купот. Сезонава настапуваше во четвртата лига Југозапад каде како лидер во моментот на прекин избори пласман во 3.Бундеслига бидејќи во сите пет четврти лиги во Германија е прогласен крај поради пандемијата со коронавирусот.
Вечерва од 20:45 часот за втор финалист ќе се борат Баерн и Ајнтрахт на „Алијанц“ стадионот во Минхен. Гостите од Франкфурт важат за аутсајдери, но сепак сонуваат за деветто финале (имаат 5 титули, последната во 2018).
ДФБ Куп финалето е презакажано за 4 јули на „Олимпијаштадион“ во Берлин.
