Откако излезе статистиката за милионските суми кои граѓаните ги оставиле во приватните лаборатории тестирајќи се за COVID-19, политичката партија Левица побара од државата да преземе нешто за да се сопрат трошоците на граѓаните кои иако плаќаат здарвствебно осигурување, во случајов не ја добиваат соодветната услуга.
„Обичниот човек постојано осиромашува, додека приватните здравствени установи водени од домашната бизнис - елита, непрекинато профитираат. Од новиот владин состав решение или стратегиска визија нема ниту во најава. Фрапантен е фактот дека од почетокот на пандемијата спроведени се 1.665.043 тестирања, од кои 2/3 или 1.205.902 ковид тестови граѓаните ги платиле на приватно“, стои во соопштението на парламентарната партија.
Тие го потенцираат проблемот со немањето термини за тестирање на државните клиники, по што граѓаните се приморани на дополнителни трошоци по приватните медицински установи.
„Еден од начините преку кои државата ги принудува граѓаните да плаќаат тестови во приватните лаборатории е тоа што матичните лекари не можат да закажат термини за тест во државна лабораторија, а кога ќе најдат слободен термин, тогаш тоа е најчесто во друг град кој е далеку од местото на живеење на пациентот. Дури и кога матичниот ќе успее да закаже тестирање, истото може да се чека по неколку дена, што ако се земе предвид ургентноста и спецификата на проблемот, ова за пациентот може да биде фатално“.
Левица побара државата целосно да го преземе процесот на тестирање додека трае пандемијата за да се прекине финансискиот товар на граѓаните.
„Заради ова, по примерот на бројни земји, Левица бара државата целосно да го преземе под своја надлежност процесот на тестирање од приватните клиники (барем во време на пандемијата). Инсистираме спроведувањето на тестовите да биде обезбедено од буџетски средства, кое ќе овозможи достапно и бесплатно тестирање за сите граѓани, со што ќе помогне за остварување на уставно загарантираното неприкосновено право на живот и право на здравствена заштита на граѓаните“.