Правниот тим на Левица денеска поднесе Иницијатива за оценување на уставноста и законитоста на контроверзната Одлуката за именување на улици, донесена од страна на Советот на Град Скопје на ден 30 март 2021 година, со која улици во македонската престолнина добија и фашистички колаборатори.
Од Левица велат дека не е проблем улици да добиваат етнички Албанци, туку проблемот е што добиваат луѓе кои се бореле против македонската држава. Објавија повеќе имиња на етнички Албанци кои се бореле во НОБ против окупаторија и побараа тие да добијат улици наместо колабораторите на фашистите и нацистите.
„Оваа одлука донесена во времето на Петре Шилегов, освен што претставува популистичка мерка и обид за мобилизирање на изборни гласови од страна на албанското гласачко тело, претставува и директна спротивност на член 6 од Законот за именување на улици, мостови и плоштади, поточно, ги навредува националните чувствата на македонскиот народ и предизвикува нетрпеливост и раздор помеѓу етничките заедници во Република Македонија.
Улиците кои со што се опфатени со нашата иницијатива сега ги носат имињата на Адем Демачи, Ернест Колиќи, Митхад Фрашери и Сул Хотла, кои што не само што немаат никаква допирна точка со македонската историја и македонската држава, туку се и спротивни на антифашистичкиот дух на борбата на македонскиот народ за слободна држава“.
Во оваа политичка партија велаат дека мотивот за поднесување на оваа иницијатива не е од етнички карактер, напротив, и наведоа Албанци кои ги дале своите животи за слободата во Втората светска војна.
„Македонската историја изобилува со Албанци кои што биле дел од антифашистичката борба и се бореле рамо до рамо со македонскиот народ и другите народи за независна и слободна македонска држава. Такви личности се Ибе Паликуќа, Кемал Аголи, Том Ник Ѓелај, Нафи Сулејмани, Шахи Мехмети, Мурат Бафтијари, Шаин Садику и многу други.
Левица како политичка партија која во своите редови има членови од сите етнички заедници, смета дека именувањето на улиците и другите објекти во Република Македонија треба да биде по личности кои што се дел од генезата на Република Македонија како слободна и независна држава и кои што се во духот на градење на соживот, базиран на зеднички антифашистички темели.
Од тие причини, се надеваме дека Уставниот суд ќе постапи по нашата Иницијатива и дека ќе постапи согласно Уставот и законите на РМ“, стои во објавата на Левица.
