Охридскиот огранок на политичката партија Левица преку социјалните мрежи повика на протест против отворањето на клубот „Цар Борис III“ во Охрид.
„Поради отворањето на контроверзното здружение именувано по фашистичкиот државник, слуга на Хитлер и борец против македонизмот 'Цар Борис III', Левица - Охрид ја повикува целокупната здраворазмуна јавност на протест против уривање на уставниот и државен поредок на Република Македонија и против разгорувањето на национална омраза“, стои во повикот кој, според партијата е со цел да се зачува „достоинството на македонската нација и споменот на македонските антифашистички борци“ и да не се дозволи „рушење на интегритетот на државата“.
„На 7 октомври (петок) со почеток од 11 и 30 часот на улица 'Македонски Просветители', пред ТЦ Амам - Охрид, да се мобилизираме и да го искажеме нашиот антифашистички порив. Не за славење на крвници на македонската нација и не за воздигнување на непријателите на човештвото! Не за бугарскиот Хитлер!“, велат од Левица и нагласуваат дека најстрого го осудуваат отворањето на овој клуб во Република Македонија и „премолчувањето од страна на Владата која директно ја подржува рехабилитацијата на фашизмот“.
„Сплотени против империјализмот и антимакедонизмот, да го искажеме народниот револт. Смрт за фашизмот, слобода на народот!“, стои во повикот на Левица.