На седницата на Собранието што ќе се одржи в среда, ќе биде разгледан законскиот предлог на партијата Левица кој предвидува ограничување на патните трошоци на пратениците. Овој предлог е дел од заложбата на Левица како анти-естаблишмент партија, која бара намалување на привилегиите на функционерите, кои се злоупотребуваат, што предизвикува фрустрација кај народот.
„Пратениците во текот на своето работење ги злоупотребуваат патните трошоци, што ги оптеретува граѓаните, и токму затоа Левица предлага овој закон. Наместо астрономски суми кои што сега се користат, предложуваме пресметка на патните трошоци според пазарната цена на 6,5 литри гориво на секои 100 километри. Ова е разумен и рационален пристап кој ќе биде прифатлив за сите пратеници и ќе го намали оптоварувањето на буџетот“, велат од Левица.
Сегашната практика дозволува пратениците да бараат надоместоци за амортизација и патарини, што доведува до многу високи износи на патни трошоци, па дури и до случаи каде некои пратеници оддалечени од Скопје добиваат и до 800.000 денари за патни трошоци. За разлика од нив, пратениците од Левица не користат овие привилегии и сами ги покриваат своите трошоци за кирија во Скопје, сметајќи дека нивните плати се доволни за тоа.
„Овој законски предлог ќе има директни користи за граѓаните, бидејќи средствата кои ќе се заштедат можат да се пренаменат за подобрување на животниот стандард на најранливите категории, како што се сиромашните и маргинализираните групи. Ние, како пратеници, сакаме да покажеме пример и да се грижиме за оние кои најмногу имаат потреба од помош“, информираат од партијата.
Левица апелира до мнозинството и до власта да го поддржат ова рационално решение и да го усвојат законот за ограничување на патните трошоци, кој ќе биде разгледан на седницата в среда.
