Иако синоќа не играше, благодарение на поразот на Вест Бром тимот на Езџан Алиоски го завери долго очекуваниот пласман во англиската елита.
Македонија наредната сезона ќе има свој претставник во Премиер лигата. Синоќа тимот на нашиот репрезетативец Езџан Алиоски го прослави пласманот во најквалитетното натпреварување на Островот.
Лидс Јунајтед синоќа немаше натпревар, но играше неговиот конкурент Вест Бромвич Албион кој загуби на гостувањето кај Хадерсфилд со 2:1. Тоа значи дека Вест Бром остана на 5 бодови зад Лидс и со само еден преостанат натпревар не може да го престигне. Лидс е прв со 87, Вест Бром има 82, а трет е Брентфорд со 81 бод. Првопласираните два тима обезбедуваат пласман во елитата.
Тимот на Марсело Биелса со години се обидува да се врати во Премиер лигата каде последен пат играше во сезоната 2003/04 кога испадна. Тоа се случи три години откако стигна до полуфиналето од Лигата на шампионите.
Нашиот репрезентативец веќе трета сезона го носи белиот дрес откако летото 2017 година дојде од швајцарски Лугано. Сезонава настапи на 37 натпревари, постигна 5 гола и 4 пати асистираше.