Компанијата APWorks, која е една од компаниите на Airbus, изработи електричен мотоцикл, чија конструкција е направена со 3D печатење. Во изработката на моделот Light Rider е користена технологија од авио-индустријата.
Необичниот изглед на овој електричен модел е добиен со спојување на илјадници ултра-тенки слоеви кои создаваат делови што потоа се споени во една целина со што се добива лесна и цврста конструкција.
APWorks користеле еден вид алуминиум кој се користи во производството на авиони, па мотоциклот е тежок само 35 килограми.
За погон користи електромотор од 6kW, кој испорачува 130Nm максимален вртежен момент. Од нула до 45 километри на час, Light Rider забрзува за 3 секунди, а максималната брзина му е 80 километри на час. Со полна батерија може да помине околу 60 километри.
APWorks планира да понуди на пазарот ексклузивна серија од 50 примероци на моделот Light Rider, а со оглед на врвната технологија и материјалите, цената ќе биде астрономски висока.
Мотоциклот ќе чини 50.000 евра, а за да дојдат до него, потенцијалните купувачи ќе мора да остават депозит од 2.000 евра.