По втор пат во својата историја тимот на Лион ќе игра во полуфинале откако синоќа ја изненади целокупната фудбалска јавност со победата и елиминацијата на Манчестер Сити.
По Јувентус, Лион исфрли уште еден фаворит. Милијардерите од Островот мораат да се соочат со уште една разочарувачка сезона во Лигата на шампионите откако синоќа потфрлија и потклекнаа пред тимот за кој сите се прашуваа со колку голови во мрежата ќе го победат.
Котиворијанецот Максвел Корне во 24. минута го најави изненадувањето по еден контра напад. „Граѓаните“ се мачеа, но конечно во 69. минута по одлично проигрување од Рахим Стерлинг на 1:1 израмни Кевин Де Брујне.
Кога сите очекуваа целосен пресврт, на сцена стапи Муса Дембеле и во 79. минута од контра повторно донесе водство на Лион.
Во 85. минута следуваше срамна утка на Стерлинг кој промаши празен гол, а во акцијата која следуваше во наредната минута Дембеле ја казни грешката и зголеми на 1:3 ставајќи крај на надежите на тимот на Пеп Гуардиола.
Лион по втор пат во својата историја ќе игра полуфинале откако единствениот пат му беше во сезоната 2009/10 кога доживеа елиминација од Баерн. Интересно, токму повторно против Баерн и овој пат ќе играат Французите.
За Манчестер, пак, уште едно разочарување. Клубот нема европска титула од сезоната 1969/70 кога го освои Купот на победниците на куповите, што му е и единствена европска титула во историјата.
Полуфинале:
Лајпциг - ПСЖ (18 август)
Лион - Баерн (19 август)