Потпишувањето на нов договор не ја гарантира иднината на Матајс де Лихт во Јувентус бидејќи двата премиерлигаша се сѐ посериозни во намерата да го преселат холандскиот дефанзивец на Островот.
Нов договор е веќе спремен и доставен до 22-годишниот Холанѓанец, кој ќе му донесе нови две години во Торино, но со истата плата која и во моментов ја заработува. Јувентус не сака да го оптоварува буџетот, но прашање е дали Де Лихт ќе со согласи на договор кој не му носи никакво покачување, а во време кога има интерес и од поконкурентни и побогати клубови.
Како што пренесува Calciomercato, дури и доколку Де Лихт стави потпис на новиот договор тоа нема да биде гаранција за негово останување во бело-црниот дрес. Тоа е затоа што Ливерпул и Челси се прилично загреани за него и веќе вршат притисок врз управата на „Старата дама“.
Де Лихт нема јавно обелоденето било какво незадоволство од играњето во Торино и не бара да си оди. Но, тоа лесно може да се случи во зависност од сериозноста на интересот кој доаѓа од Премиер лигата.
Сезонава Де Лихт одигра 30 натпревари во Серија А и постигна 3 гола со 1 асистенција. Одигра и 7 натпревари во Лигата на шампионите и 4 во Копа Италија.
Во Јуве дојде летото 2019 од редовите на Ајакс кога „Старата дама“ искешира дури 85,5 милиони евра за тогаш 19-годишното чудо од дефанзивец.
Моменталната вредност на Де Лихт се проценува на 75 милиони, но во сегашниот договор има клаузула според која секој што сака да го откупи мора да исплати 125 милиони евра. Тоа е втората причина поради која Јуве сака тој да потпише нов договор, за да се постави нова, пониска клаузула.