Шеикот Калед Бин Зајед Ал Нејахан, кој е братучед на сопственикот на Манчестер Сити, шеикот Мансур, денеска понуди сума од 2 милијарди фунти со која сака да го купи англискиот клуб Ливерпул.
Раководството на Ливерпул ја одби оваа понуда и му порача на шеикот Ал Нејахан дека може, доколку сака, да инвестира во клубот.
Fenway Sports Group, групацијата која е сопственик на Ливерпул, го одби обидот на шеикот со објаснување дека неговата понуда не е ниту доволно добра, а дури и ако била доволно добра, тие не се заинтересирани за продажба на англискиот клуб.
„Ние од Fenway Sports Group стоиме зад клубот и во моментов не сме заинтересирани за продажба. Но, под правите услови и правата цена, може да размислиме за инвеститор кој ќе управува со мал процент на акции и со тоа ќе ја зацврсти комерцијалната моќ на клубот и ќе му помогне да порасне“, пишува во изјавата дадена од групацијата.
Ова не е првпат некој надворешен милијардер да се заинтересира за купување на Ливерпул. Лани клубот предизвика интерес кај финансиерката Аманда Стејвли, која не успеа во купувањето на Ливерпул, па го сврте интересот кон Њукасл.