Натпреварот Лигата на шампионите се играше со публика, но некои гостински навивачи откажаа во последен момент поради страв од коронавирусот.
Во деновите кога се играше натпреварот во Ливерпул, шпанскиот главен град бележеше покачување на заразените од COVID-19, а ситуацијата стануваше загрижувачка. Ниту УЕФА, ниту пак британската Влада, не се решија да реагираат со евентуална забрана, па навивачи од Мадрид дојдоа на „Енфилд“.
Сепак, меѓу нив имало и 290 совесни кои го откажале нивното патување почитувајќи ги превентивните мерки на шпанската Влада. Нивните билети, нормално, пропаднаа, со оглед на тоа што откажувањето било направено во последен момент.
Иако напреварот денес важи за еден од поттикнувачите за ширењето на вирусот во Англија, токму поради доаѓањето на навивачите од Мадрид, Ливерпул не сака ни да чуе да ги рефундира Шпанците.
Навивачите сепак си ги добиле назад парите дадени за влезници, но од нивниот Атлетико. Клубот ова излегување во пресрет на навивачите го чини 17 илјади евра, пари кои и денес Ливерпул не сака да ги плати.
Според „Црвените“, натпреварот тогаш немал никаква забрана од УЕФА и откажувањето на тие 290 навивачи е нивна волја и не подлежи на оправдано рефундирање.
Атлетико го елиминираше актуелниот бранител на тронот победувајќи на „Енфилд“ со 2:3 по продолженија, а славеше и на првиот натпревар на „Ванда Метрополитано“ со 1:0.
Атлетико, исто така, рефундираше и 4.500 купени билети за наредните натпревари од Ла Лига.