Доброто добро враќа, е стара изрека, чија вистина неодамна ја потврдија и вработените на бензинска пумпа во Лима.
Имено, вработени на бензинска пумпа во главниот град на Перу забележале слабо куче скитник. Кучето воопшто не изгледало добро, па вработените почнале редовно да го хранат. Немале поим дека еден ден истото куче ќе ја заштити станицата и ќе спречи грабеж.
Според Хавиер дел Кастиљо, еден од вработените, кучето скитник по име Гринго барало храна и засолниште околу бензинската пумпа некое време откако некој го напуштил.
Поради топлата грижа на персоналот на станицата, Гринго постепено станал редовен посетител. Поради многу лошото обезбедување, таа станица доживеала четири грабежи за само една недела и вкупно 11 за три месеци.
Едно утро, Гринго бил таму кога ненадејно се појавиле двајца разбојници вооружени со ножеви и им се заканиле на вработените барајќи да им ги предаде парите.
„Тие им рекоа да им дадат сѐ што има, а потоа Гринго веднаш излезе и тргна по ограбувачите, па и двајцата побегнаа“, изјави Хавиер.
Кучето скитник веднаш станало локален херој откако покажало неверојатна храброст и го привлекло вниманието на управата на бензинската пумпа. Компанијата одлучила да го награди Гринго и му ја понудила официјалната позиција на чувар на станицата.
Кастиљо објасни дека откако Гринго станал дел од персоналот на бензинската пумпа, сега сите се чувствуваат многу побезбедни.
Во слободното време, Гринго ужива да игра со персоналот на станицата и веќе стана навистина сакан член на тимот.
„Тој навистина не прифаќа луѓе со лоши намери. Чувствува, куче е, не треба да го прашуваш. Веднаш знае дали сте дошле со добри или лоши намери“, заклучи Кастиљо.
