Лондонската полиција и единиците за специјални намени SAS добиле наредба да бидат подготвени за серија од десет истовремени терористички напади на улиците на британската престолнина, пишува неделното издание на весникот Times повикувајќи се на локалните власти.
„Предвидовме во планот дејствување во случај на три симултани напада, но настаните во Париз (ланскиот 13-ти ноември) покажаa дека е неопходно да бидеме подготвени за поголем број напади. Подготвени сме, доколку некој се обиде да изврши седум осум девет, десет...“, го цитира весникот неименуваниот високо рангиран владин функционер, запознаен со состојбите во безбедноста.
Покрај тоа, армиските полкови, кои се распоредени во близина на Лондон, се ставени во состојба на готовност, доколку е потребно да им помогнат на полициските и силите на SAS. Формиран е, исто така, специјален тим од припадници на безбедносните структури во грофовијата Оксфордшир, кој доколку е потребно може да онеспособи хемиска или биолошка закана, вклучително и ткн „валкана бомба“.
Според сознанијата на весникот, британските власти стравуваат дека Лондон може да биде цел на терористите кои се вратиле од Сирија, кои можат да организираат серија напади, слично како во Париз.
Вечерта на 13-ти ноември 2015 година три координирани терористички групи извршија серија напади во Париз и неговото предградие Сен Дени. Тројца џихадисти со „самоубиствени појаси“ се разнесоа крај стадионот „Стад де Франс“ на кој се играше пријателскиот фудбалски меч меѓу селекциите на Франција и Германија. Втората група, веројатно од четворица напаѓачи од кои по еден се трага, нападна кафулиња и ресторани во североисточниот дел на Париз. Други тројца држеа заложници посетители на рок концерт во концертната сала „Батаклан“. Вкупно беа убиени 130 луѓе, а повеќе од 350 беа ранети.