Халид Масуд, кој изврши терористички напад пред Парламентот во Лондон минатата недела, делувал сам, тврди полицијата.
„Мора да го прифатиме фактот дека можеби никогаш нема да сфатиме зошто го направи тоа. Таа тајна можеби умре заедно со него“, рече комесарот Нил Бас.
Масуд уби петмина и повреди 50 луѓе кога со автомобил влета во група луѓе, а претходно со нож уби полицаец.
Полицијата соопшти дека Масуд го извршил нападот за 82 секунди.
„Уште сметаме дека делувал сам и засега нема информации дека планирал други напади. Иако нападот го испланирал сам, ние мора да утврдиме зошто го изведе овој ужасен чин за да може да им дадеме одговори на жителите на Лондон и на семејствата на жртвите. Одлучни сме да откриеме дали Масуд бил инспириран од терористичка пропаганда или некој друг го охрабрувал, поддржувал или насочувал. Ако ова второво е точно, тие луѓе ќе ги стигне правдата“, додаде Бас.
Тој апелираше до луѓето кои го познавале Масуд да разговараат со полицијата.