Една од главните теми во шпанските медиуми е односот помеѓу ѕвездата на Реал, Винисиус Жуниор и публиката ширум Шпанија, во која доминира зборот расизам. Интересна презентација на таа тема имаше поранешниот фудбалер на Барселона и Валенсија, а сега колумнист на As, Жерард Лопес.
„Навредите што ги доби во Валенсија не треба да се мешаат со провокативниот и дрзок однос кој фудбалерот го покажува на секој натпревар. Со таквиот однос по секој натпревар се зголемува листата на непријатели, без разлика дали се тоа ривали, судии или навивачи. Тој е персона нон грата во Памплона, Мајорка и сега во Валенсија“, пишува Жерард Лопес во колумната.
Во текстот, поранешниот репрезентативец изнесе теза, која добива сѐ повеќе поддржувачи, дури и кај навивачите на Реал Мадрид.
„Фудбалерот мора да размисли за своето однесување бидејќи ова вака ќе оди и во иднина, а тој на крајот ќе си замине, нешто што ниту Реал не го исклучува. Во ова сценарио, поради неговата пазарна вредност и придонесот во играта, гледам трејд за Мбапе како единствено решение. Такво решение би било најдобро за сите. На Флорентино Перезс би му се исполнила големата желба, додека од друга страна ПСЖ би добил ѕвезда која е во рангот на Мбапе, која не би правела проблеми во клубот“.
