Новиот тренер на Реал Мадрид Хулен Лопетеги денеска беше официјално претставен на прес-конференција на „Сантијаго Бернабеу“. Тој потпиша тригодишен договор со „кралскиот клуб“ и предизвика скандал во шпанската репрезентација што ја водеше од летото, 2016 година.
Лопетеги доби отказ само два дена пред отворањето на СП 2018, а шпанската репрезентација ја презеде Фернандо Јеро.
Лопетеги дојде на претставувањето со сопругата и децата, а пред прес-конференцијата се фотографираше со Флорентино Перез кој му го врачи дресот на Реал Мадрид пред низата од 13 пехари.
По краткиот вовед, Лопетеги се расплака пред новинарите и челниците на клубот кои му возвратија со овации.
„Вчера беше најтажниот ден во мојот живот, откако мајка ми... Денеска сум најсреќниот човек на светот. Му благодарам на претседателот Флорентино Перез, му благодарам на Реал, на укажаната доверба и одговорноста што ми е дадена. Со гордост ја прифаќам оваа одговорност. Знам каде одјдов, знам што значи Реал и ќе направам сѐ да продолжиме да се бориме и да бидеме уште подобри. Се надевам дека нема да бидам премногу возбуден тука пред вас, сакам да кажам толку многу... сакаме да останеме на врвот, да ги развиваме нашите играчи и нашиот клуб. Ви благодарам на сите, се чувствувам како дел од семејството.“