Новиот тренер на Реал Мадрид, Хулен Лопетеги, вечерва ќе дебитира на клупата на шпанскиот клуб во официјален натпревар од рамките на европскиот Суперкуп против Атлетико Мадрид.
На тој начин, Лопетеги добива шанса да освои трофеј уште во првиот официјален натпревар на клупата на Реал Мадрид, и тоа против градскиот ривал Атлетико.
„Зидан вршеше одлична работа во овој клуб. Освои многу титули, но сега тој е минато. Мораме да се фокусираме на иднината, да продолжиме да освојуваме трофеи и да бидеме подобри. Не смееме да гледаме кон минатото, потребна ни е напорна работа“, рече Лопетеги.
Летово клубот го напушти најдобриот играч на Реал Мадрид во последната деценија, Кристијано Роналдо, а сега се очекува од Герет Бејл да ја преземе улогата на главна ѕвезда и офанзивна сила во составот.
„Герет (Бејл) е долгогодишен член на Реал Мадрид. Сјаен е од стартот на подготовките, многу мотивиран и свесен е колку е важен за тимот. Не сакам да зборувам каков беше претходно, сега јас работам со него и сум презадоволен. Истото важи и за Карим Бензема“, изјави Лопетеги.
Натпреварот помеѓу Атлетико Мадрид и Реал Мадрид се игра вечерва во Талин од 21:00 часот.