Фудбалерите на Милан катастрофално влегоа во 2023 година и со својата игра и резултати не се ни сенка на тимот кој минатата година ја освои шампионската титула наа Италија по 11 години чекање.
Милан синоќа доживеа нов, овојпат најтежок „шамар“ на гостувањето кај Лацио каде речиси сигурно згаснаа сите надежи за одбрана на титулата во Италија. „Росонерите“ имаат 12 бода помалку од Наполи, а како што играат сега, можно е оваа разлика наскоро да се зголеми на недостижна разлика.
Во само пет натпревари, во кои Милан не знаеше за победа, ја загуби шансата да освои три трофеи.
Сето ова доаѓа по изјавата на директорот Паоло Малдини во која потенцира дека нема потреба од засилувања бидејќи славниот клуб е конкурентен за четири трофеи.
„Во овој момент не ни се потребни засилувања. Сè уште играме во сите четири натпреварувања и во сите сме конкурентни за трофејот“, изјави Малдини пред нешто повеќе од еден месец и предизвика револт кај навивачите на Милан кои видоа дека се неопходни засилувања за да се одржи континуитетот.
Оттогаш, Милан испадна од Купот на Италија од Торино, го загуби италијанскиот Суперкуп од Интер, а потоа низа порази во Серија А го спуштија на неверојатни 12 бода од одбраната на титулата.
Останува само Лигата на шампионите. Иако овој клуб има седум титули и е втор најтрофеен клуб во Европа во најелитното натпреварување, со оглед на игрите кои денеска ги прикажува шампионот на Италија, тешко е да се очекува премин во четвртфиналето преку Тотенхем.
