Колумбиските медиуми објавија дека Шакира и Жерар Пике се разделија и дека популарната пејачка веќе се иселила од нивниот заеднички дом во Барселона. Информацијата ја потврди и шпанскиот портал „Cotilleo“ кој тврди дека двојката дефинитивно се раздели.
Шпекулациите траеја со денови, а медиумите коментираа дека двајцата не биле видени заедно во јавност со месеци. Последен пат заедно беа на свадбата на Лионел Меси во Аргентина, во јули годинава.
Засега ни пејачката, ни фудбалерот ја немаат официјално потврдено веста, но нивни блиски луѓе велат дека двојката е во процес на раскинување и дека Шакира си заминала од куќата. Таа сепак доаѓа таму одвреме-навреме за да бидат децата со двајцата родители.
„Станува збор за нешто сериозно и таа донесе конечна одлука“, рече извор близок до славната двојка.
Шакира моментално се подготвува за светската турнеја „El Dorado“ што би можела да претрпи последици поради отворените и остри ставови на Пике во врска со референдумот за независност на Каталонија.
Шакира и Пике се заедно шест години и имаат два сина, Милан и Саша.
Како домашните проблеми да не му беа доволни, Пике континуирано се соочува и со незадоволство од навивачите на шпанската репрезентација.
Откако беше исвиркан на тренинг на репрезентацијата кога навивачите излегоа со транспаренти „Пике, оди си“, со свирежи го испратија и од натпреварот од 9. коло од квалификациите за Светското првенство во Русија 2018.
Дефанзивецот на Барселона во третата минута заработи жолт картон, поради што селекторот на Шпанија реши да го извади од игра 15 минути подоцна, а на негово место на терен излезе Начо.
Кога се правеше измената, Пике беше исвиркан, а причините за ваквите реакции се неговото поддржување на референдумот за независност на Каталонија и неговите изјави дека е подготвен да се повлече од репрезентацијата на Шпанија ако ваквите негови размислувања прават проблеми во екипата.