Иако често е критикуван поради грешките на теренот, Ловрен имаше одлично лето во кое одигра две финалиња – едно во Лигата на шампионите и едно на Светското првенство. Веднаш откако Хрватска се пласираше во финалето на СП, тој не пропушти да се прогласи себеси за „еден од најдобрите дефанзивци во светот“.
„Луѓето би требало да прифатат дека јас сум еден од најдобрите дефанзивци во светот“, изјави Ловрен за англиските медиуми набрзо по завршувањето на полуфиналниот натпревар од Светското првенство.
Изјавата на Дејан Ловрен во Англија беше пречекана со смеа, медиумите го окарактеризираа како егоист и арогантен, но тој и понатаму стоеше зад неговите зборови. Тој пред неколку дена гостуваше во YouTube шоуто „Fifa & Chill“ на каналот Copa 90, каде уште еднаш го потенцираше истото.
„Понекогаш не ги заслужувам критиките кои ги добивам“, рече стоперот на Ливерпул и продолжи да го аргументира својот случај, притоа споредувајќи се со капитенот на Реал Мадрид, Серхио Рамос.
„Ако ја погледнете статистиката ќе видите дека Рамос греши повеќе од мене, но тоа што игра во Реал Мадрид му оди во прилог. Дури и кога греши, никој не го опоменува. Кој би те критикувал кога постојано победуваш со 5:1, 5:2?“, додаде Ловрен.
Во разговорот со екипата на Copa 90 тој рече дека Вирџил ван Дајк, Рафаел Варан и Тијаго Силва ги смета за најдобрите дефанзивци во светскиот фудбал.
Откако започна сезоната, Дејан Ловрен имаше помала минутажа отколку во последните две сезони, но е далеку постабилен како дефанзивец. Тој одмараше поради тоа што Клоп сезонава може да си дозволи да ги чува играчите свежи бидејќи има поголема ротација во тимот.