По синоќешните натпревари од петтото коло, познати се уште четворица учесници во осмина финалето на Лигата на шампиони.
Баерн, Манчестер Сити, Јувентус и Манчестер Јунајтед им се придружуваат на Барселона, Рома, Реал Мадрид и на Ајакс во завршницата од елитното европско клупско натпреварување.
Баерн во групата Е ја совлада Бенфика со 5:1 и му се придружи на Ајакс кој денес го совлада АЕК во гости со 2:0. По два погодоци за Баварците постигнаа Арјен Робен и Роберт Левандовски, а еден гол даде Франк Рибери. Првиот погодок на Робен беше вистинско ремек-дело. Холанѓанецот во свој стил помина четворица играчи и го погоди спротивниот агол од десната страна во 13-тата минута. По половина час игра заби по втор пат, а потоа Полјакот зголеми на 3:0. Почесниот гол за гостите го постигна Жедсон Фернандес во 46. минута, а Рибери во 77-та погоди за конечни 5:1.
Во групата F Манчестер Сити освои бод кај Лион со резултат од 2:2 што му овозможи да продолжи понатаму. Лион подобро играше во поголемиот дел од мечот, но голот на Серхио Агуеро за „граѓаните“ во 83-тата минута беше решавачки.
Јувентус ја совлада Валенсија на домашен терен со 1:0 со голот на Марио Манџукиќ во 59-тата минута, на одлична асистенција на Кристијано Роналдо.
Манчестер Јунајтед се спаси од уште една „бламажа“ благодарение на Маруан Фелаини кој во 91. минута заби гол за славење против Јанг Бојс пред домашните навивачи.