Фудбал

ЛШ: Реал Мадрид чека на триумф против Ајакс за спас на сезоната

5. март 2019 - 13:57 | К.З.

Три натпревари во седум дена на Сантијаго Бернабеу требаше да го одредат патот во кој се движи сезоната на Реал Мадрид. Претходните два резултираа во порази од Барселона, а овој последниот ќе одлучи дали „кралевите“ ќе ја продолжат борбата за одбрана на титулата од Лигата на шампионите.

Пораз од Ајакс за Реал Мадрид би значел предвремен крај на сезоната, без шанса да се бори за некоја од трите титули кои беа во игра.

Лигата на шампионите е единственото натпреварување кое им остана на играчите на Реал Мадрид, а задачата не ја прави ништо полесна ниту отсуството на Серхио Рамос, кој на првиот натпревар заработи жолт картон со кој доби автоматска суспензија, за потоа да признае дека го добил картонот намерно, па УЕФА му ја продолжи суспензијата за уште еден натпревар.

Ајакс не е наивен противник. Баш напротив, доколку холандскиот тим нападне од првата минута и остане концентриран до самиот крај, може да се надева на победа против Реал Мадрид. Но, проблемот за Ајакс лежи во негативата од првиот натпревар, кој го загуби со 1:2 на домашен терен.

Вториот натпревар вечерва е оној помеѓу Борусија Дортмунд и Тотенхем, во кој германскиот тим брка негатива од 3:0 од првиот натпревар. Слично како кај Реал Мадрид, и сезоната на Борусија Дортмунд полека паѓа во вода, откако тие ја прокоцкаа бодовната предност на табелата во Бундес лигата во однос на Баерн Минхен.

Во двата состави ќе недостасуваат играчи, но најзначајни се отсуствата на Лукас Пишчек (Борусија Д.) и Деле Али (Тотенхем). Хари Кејн се опорави од повредата порано отколку што се очекуваше и ќе може да настапи на гостувањето во Германија.

Коментирај