Моментот кога италијанскиот репрезентативец Џорџо Кјелини го повлече Букајо Сака за дресот за време на финалето на ЕУРО против Англија стана вирално меме, а сега и тетоважа.
Се играа последните минути од финалето на Европското првенство помеѓу Италија и Англија кога Сака се обиде да му избега на Кјелини на средина од теренот крај аут-линијата и да создаде опасен контра-напад, но капитенот на „Аѕурите“ не му дозволи да го стори силно повлекувајќи го за дресот при што и го сруши на земја. Кјелини доби жолт картон, но не обрна внимание бидејќи очигледно му беше многу поважно да спречи опасност по неговиот гол.
Еден италијански навивач го овековечи тој момент со тетовирање на „рачната сопирачка“ на Кјелини на неговата рака. Тетоважата покажува како Кјелини го спречува Сака да стигне до трофејот кој му се доделува на победникот на континенталниот собир.
Да потсетиме, Италија стана европски шампион по подобро изведување на пенали, а Сака не успеа да постигне гол од белата точка и во последната решавачка серија.