Лудило на ЛОИ: ВАР по 2 часа поништи гол и ги врати Аргентина и Мароко на терен

Иако отворањето на Олимпијадата е в петок, фудбалскиот турнир почна денес. И тоа каков почеток - уште на првиот натпревар контрозерзија.

Откако сите медиуми пренесоа дека Аргентина и Мароко одиграа 2:2, два часа подоцна двете репрезентации мораа да излезат на терен и да одиграат уште 3 минути оти голот на Аргентинците за израмнување бил нерегуларен.

Олимпискиот фудбалски турнир годинава ќе има многу ѕвезди, а на турнирот пристигнаа и репрезентациите на Аргентина и Мароко со одлични тимови кои заедно со дуелот Узбекистан - Шпанија го отворија натпреварувањето.

Мароканците поведоа со голот на Суфјане Рахими во 2. минута од судиското надополнување на првиот дел по една фантастична акција, а истиот играч на отворањето на вториот дел од пенал ја удвои предноста на африканската селекција.

Голот за надеж за Аргентинците го постигна Џулиано Симеоне во 68. минута, а тимот предводен од Хулиан Алварес и Николас Отаменди израмни во 106. минута преку Кристиано Медин. Никому не му е јасно зошто шведскиот судија ја продолжи играта за дури 15 минути.

Голот ги налути мароканските навивачи кои почнаа да прават нереди и всушност натпреварот беше прекинат без да биде свирнат крај.

Во ВАР собата судиите во наредните два часа го прегледувале голот за 2:2 на Аргентина, по што одлучиле дека е нерегуларен поради офсајд. За да се официјализира одлуката треба натпреварот да е во тек, па шведскиот судија Нибериј ги извести двете репрезентации дека треба да излезат на терен и да доиграат уште три минути, иако беа поминати околу два часа по прекинот.

Така, играчите повторно излегоа на терен, ВАР го поништи голот на Аргентина, се одиграа уште три минути во кои Мароко го одбрани водството и запиша 3 бода на стартот.

Во оваа група Б се уште и Ирак и Украина.