Фудбал

Лудило во Чемпионшип: Биелса испрати шпион на тренингот на Дерби Каунти

11. јануари 2019 - 21:44 | К.З.

Целата англиска фудбалска јавност знаеше дека доаѓањето на Марсело Биелса на Островот ќе донесе една луда сезона во Чемпионшип, но ексцентричниот „Ел Локо“ ги помести границите на еден само за него својствен начин – испрати шпион на тренингот на Дерби Каунти.

Тренерот на Лидс дури и призна дека испратил човек да го шпионира тренингот на Дерби Каунти, но одби да се извини за инцидентот.

Дерби Каунти и нивниот тренер Френк Лампард објавија дека непознат човек бил присилно отстранет од нивниот тренинг во пресрет на мечот против Лидс Јунајтед, во моментов водечката екипа на табелата во Чемпионшип лигата. Тренингот бил запрен во истиот момент и Фудбалската асоцијација на Англија потврди дека ќе го испитува инцидентот.

Пред да започне натпреварот помеѓу Лидс Јунајтед и Дерби Каунти, Марсело Биелса беше запрашан од страна на медиумите за неговата вмешаност во ситуацијата која се случи во четврток попладне. Тој не се двоумеше околу неговиот одговор.

„Точно е дека човекот кој го шпионираше тренингот (на Дерби Каунти) беше пратен од Лидс. Јас сум одговорен за тоа. Не ме интересира дали е легално или нелегално, правилно или погрешно...за мене е доволно тоа што Френк Лампард и Дерби сметаат дека не е исправно и дека јас не се однесував добро. Тоа го правам одамна и знам дека не е нелегално, дури и зборувам за тоа со медиумите“, изјави Биелса.

Тренерот на Дерби Каунти не беше воодушевен од потегот на неговиот колега. Лампард рече дека истото се случило и во првиот дел од сезоната, кога двата тима за првпат се сретнаа во меѓусебен дуел.

„Лидс може да победат со 4:1 бидејќи тоа е еден фантастичен тим, но факт е дека имаа човек во грмушките од нашиот тренинг камп. Човекот беше замолен да си оди, но не сакаше да го направи тоа“, изјави Лампард.

Коментирај