Несреќниот лев бек на Манчестер Јунајтед и англиската репрезентација синоќа повторно го извлече подебелиот крај, откако ја почна сезоната во одлична форма и заборави на повредите.
Имено, Шо во 53-тата минута од натпреварот против Шпанија се судри со Дани Карвахал и доживеа тежок нокаут, по што следуваше страшен пад на земја по кој неговите соиграчи се загрижија дека тој можеби никогаш нема да ја продолжи кариерата.
Шо остана онесвестен на земја, а докторскиот тим на англиската репрезентација веднаш дотрча до него. Околу него беа неговите соиграчи од репрезентацијата и во само неколку минути драмата можеше да се почувствува на теренот, но и на трибините. На крајот, тој беше изнесен од теренот на носилки и на лицето носеше маска за кислород. Навивачите присутни на Вембли го поздравија младиот лев бек со силен аплауз.
Според англиските медиуми, Лук Шо доживеал потрес на мозокот, но сега се чувствува добро и работи на закрепнување од шокантната повреда.
Само да потсетиме дека Лук Шо подолго време е на мета на критики поради неговата подложност на повреди. Тој отсуствуваше поради повреди преку 500 дена откако се приклучи на Манчестер Јунајтед, а најсериозната повреда дојде во 2015 година, кога по еден старт на дефанзивецот на ПСВ, Хектор Морено, настрада ногата на Шо. Поради таа скршеница Шо отсуствуваше од терените цели 305 дена.